काठमाडौँ — धनगढी एफसीले सेनेगल राष्ट्रिय फुटबल टिमका पूर्व डिफेन्डर फलु डियाग्नेलाई विदेशी खेलाडीका रूपमा शनिबार अनुबन्ध गरेको जनाएको छ । युरोपेली लिगमा खेलिसकेका ३४ वर्षीय डियाग्नेसँगै धनगढीमा दोस्रो संस्करणको नेपाल सुपर लिग (एनएसएल) का लागि अर्को विदेशी खेलाडी ओलावाले आफिज रहेको छ ।

पछिल्लो पटक चेन्नई एफसीको प्रतिनिधित्व गरेका डियाग्नेले यसअघि फ्रान्सको लिग वान एफसी मेट्ज, बुन्डेसलिगाको फ्राइबर्ग र वेडेर ब्रेमनबाट पनि खेलिसकेका छन् । उनले सेनेगली टिमका लागि चार क्याप जितेका छन् । धगनढीका अनुसार एनएसएलमा आवद्ध विदेशी खेलाडीमध्ये डियाग्ने अहिलेसम्मकै सबैभन्दा अनुभवी हुनेछन् ।

उनले धनगढीबाट खेल्न पाउँदा खुसी भएको बताउँदै भनेका छन्, ‘एनएसएलको पहिलो सिजतको उप–विजेता टिमसँग सम्झौता गर्न पाउँदा हर्षित छु । आफ्नो तर्फबाट सक्दो मिहिनेत गर्दै टिमलाई एक स्थानमा माथि पुर्‍याउने भूमिका खेल्ने प्रतिबद्धता जनाउँछु ।’ एनएसएलको दोस्रो संस्करण मंसिर ८ देखि सुरु हुँदैछ ।