सरोज कुमार पासमान
कर्जन्हा, १९ श्रावण । श्रावण महिनाको तेश्रो साता वितन लाग्दा पनि मधेशमा सन्तोष जनक रुपमा धान रोपाई भएको छैन् । आवश्कता बमोजिम वर्षा र सिचाईको व्यवस्था नभएपछि मधेशमा खडेरी पर्ने सम्भावना अत्यधिक देखिएको थियो । आज विहानै देखि मधेश भुभागमा वर्षाको सम्भावना देखेपछि किसानहरु हर्षित भएका छन् । धान उत्पादनको मुख्य केन्द्र रहेको मधेश प्रदेशमा अहिले सम्म ५८ दशमलव ८१ प्रतिशत मात्र धान रोपाई हुँदा चिन्ताको विषय बनेको छ । खेतमा पानिको कुनै व्यवस्था हुन नसकेपछि धेरै जसो किसानहरु वर्षाको पानीको मुख ताकिरहेकै अवस्थामा आजबाट पानि पर्ने सम्भावना देखेपछि आफुहरु खुसी भएको कर्जन्हा नगरपालिका वडा नं. ६ का किसान रामएकवाल महतोले बताए । खेतमा रोपिएको धान धेरै जसो सुकिसक्यो, खेत पानी बिना चिराचिरा परेको अवस्था छ यसपालि हामी किसानलाई धेरै क्षति हुने सम्भावना बढेको छ । तर आजबाट वर्षा नियमित रुपमा भएपछि केहि राहत मिल्नसक्ने भएपनि अब धान उत्पादनमा अत्यधिक कमी हुने महतोको तर्क रहेको छ ।
मनसुनको समयमा पनि पर्याप्त पानी नपरेपछि समस्यामा परेका तराई मधेशका बासिन्दालाई केही दिनका लागि खुसीको भएपनि यो भरपुर समस्याको समाधान नभएको किसानहरु बताउछन् । मनसुनी रेखा नेपालतर्फ सर्ने क्रममा रहेकाले तराई मधेशका जिल्लाहरुमा पनि पानी पर्ने सम्भावना छ । जल तथा मौसम विज्ञान विभागको मौसम पूर्वानुमान महाशाखाका मौसमविद गोविन्द झाले मनसुनी रेखा नेपालतर्फ सर्ने क्रममा रहेकाले एरिया कभरेजका हिसाबले धेरै ठाउँमा पानी पर्ने सम्भावना रहेको बताए । मधेश प्रदेशमा पनि पानी पर्ने सम्भावना रहेको बताउँदै उनले भने, ‘मधेस प्रदेशमा हल्कादेखि मध्यम वर्षा र एक–दुई स्थानमा भारी वर्षाको सम्भावना छ । यसबाट कृषि कर्ममा आवश्यकता परिपूर्ति त नहोला तर केही दिनलाई भए पनि राहत भने हुने सम्भावना छ ।’
