अरुण कुमार गुर्मैता
सिरहा, वैशाख १० गते । सिरहा–माडर सडक विस्तार सम्बन्धमा अर्को वैठक भोली बस्ने भएको छ । सिरहा क्षेत्र नम्बर ३ का प्रतिनिधि सभा सदस्य लीलानाथ श्रेष्ठ, सिरहा नगरपालिकाका मेयर डा नविन कुमार यादव सहितको कार्यपालिका सदस्यहरु, प्रमुख जिल्ला अधिकारी भोजराज खतिवडा सहितको सुरक्षा अधिकारी र सिरहा उद्योग वाणिज्य संघका अध्यक्ष अमरनाथ साहवीच छलफल भएको हो ।
सदरमुकामको मुख्य सडकदेखि सीमावर्ती माडर लचकाटोलसम्मको सडक विस्तार सम्बन्धमा थप छलफल सोमवारको बैठकमा हुने सिरहा उद्योग वाणिज्य संघका अध्यक्ष अमरनाथ साहले बताएका छन् । ‘आजको छलफलमा सडक विस्तार र यहाँको अर्थतन्त्रको वारेमा गम्भीर समिक्षा भयो,’अध्यक्ष साहले भने,‘अर्थतन्त्र खस्किएको बेला सडक विस्तारको नाउँमा भत्काउनु अगावै विकल्प सोच्नु जरुरी भएको छ ।’
सिरहा नगरपालिका वडा नम्बर ४ का वडाअध्यक्ष मोहम्मद समसादले सुरक्षा निकाय सहितको टोलीसँग सडक विस्तारको वारेमा गम्भीर रुपमा छलफल भएको बताएका छन् । सिरहा नगरपालिकाको कार्यपालिकाले पनि निर्णय गरिसकेको विषय भएकोले त्यसको कार्यान्वयन गराउने विषयमा छलफल भएको र थप छलफल सोमवार हुने वडा अध्यक्ष समसादले बताए ।
आजको छलफलमा सडक विस्तार गर्न मापदण्ड र सडक निर्माण गर्न आवश्यक बजेटको सुनिश्तिताको विषयमा रहेको थियो । सडक क्षेत्र खाली गराउँदा कुन मापदण्ड प्रयोग गर्ने र सडक निर्माण सुरु गर्न आवश्यक बजेटको अवस्था कस्तो भन्ने वारेमा छलफल भएको हो । सिरहा नगरपालिका वडा नम्बर ११ का वडाअध्यक्ष विनोद कामतीले सोमवारको छलफलमा सडक डिभिजन कार्यालय लहानका प्रमुखसँग सडकको मापदण्ड र बजेट बारेमा परामर्श भएपछि थप निर्णय लिई अगाडी बढ्ने बताएका छन् ।
आजको छलफलमा सांसद श्रेष्ठ, मेयर डा यादव, कार्यापालिका सदस्यहरु, नेपाल प्रहरीका प्रमुख, सशस्त्र प्रहरी बलका प्रमुख, राष्ट्रिय अनुसंधान विभागका प्रमुख र नेपाली सेनाका कर्नेलको उपस्थिती रहेको थियो ।
