अरुण कुमार गुर्मैता
सिरहा, वैशाख ७ गते । सिरहा नगरपालिकाको कार्यापालिका बैठकले सिरहा सदरमुकामसँगै दक्षिण भारतीय सीमानजिकैसम्मको मुख्य सडक(मेनरोड) विस्तार गर्ने निर्णय गरेको छ ।
कार्यापालिकाले सडक विस्तार कार्य नेपाल सरकारको मापदण्ड अनुसार जिल्ला सदरमुकाम सिरहाको सहिद राजेश ठाकुर पार्क (थानाचौक) देखि खैरटोका लचकाटोलसम्म गर्ने निर्णय गरेको छ । यसले लामो समयदेखि रोकिएको मुख्य सडकको विस्तार अब सुरु हुने भएको छ ।
नेपाल सरकारको मापदण्ड अनुसार सहायक राजमार्ग अन्र्तगत पर्ने चोहर्वा–सिरहा–माडरको यो सडक अब सदरमुकामदेखि दक्षिण ३० मिटर क्षेत्रको रह्नेछ । सडकको वीचदेखि १५/१५ मीटरको सडक निर्माण गर्न सडकक्षेत्र खाली गराउने निर्णय भएको छ ।
यससँगै सिरहा नगरपालिकाद्वारा सडक अतिक्रमित क्षेत्र खाली गर्न सूचना जारी गरिएको छ । सात दिनको समय दिदै नेपाल सरकारको मापदण्ड (१५/१५ मीटर) अनुसार सडक क्षेत्रमा राखिएको सामग्री, पक्की भवन लगायतका संरचना हटाउन प्रचारप्रसार थालिएको छ ।
सिरहा नगरपालिकाका मेयर डा नविन कुमार यादवले सदरमुकाम सिरहाको रोकिएको विकास र विस्तार अब थालिने बताएका छन् । विगतमा पनि प्रयास भएको र त्यसैको निरन्तरता दिदै अबको केही दिनमै सडक क्षेत्र खाली गराई व्यवस्थित सिरहा सदरमुकाम बनाईने मेयर डा यादवले बताएका छन् ।
सहिद राजेश ठाकुर पार्कदेखि बहिरासंघसम्म अढाई किलोमीटरमा अहिले चार लेनको सडक निर्माण सुरु भएको छ । चोहर्वासम्म चार लेनको सडक विस्तार कार्य अगाडी बढाईएको छ । जस अन्र्तगत पहिलो चरणमा अढाई किलोमीटरको काम सुरु भएको छ । यता सहिद राजेश ठाकुर पार्कदेखि भारतसँगको सीमासम्म (लचकाटोलसम्म) सडक निर्माणको बजेट सुनिश्चित भएको छैन् । चालू आर्थिक वर्ष २०७९/०८० मा यस क्षेत्रको निर्माण कार्य अगाडी बढाउन बजेट नभएको सडक डिजिभन कार्यालय लहानले जनाएको छ ।
बजेटको सुनिश्चितता छैन् : प्रमुख देव
सिरहा नगरपालिकाको कार्यपालिकाले सडक क्षेत्र खाली गराउने निर्णय गरेपनि सडक विस्तार गर्न आवश्यक बजेटको सुनिश्चितता हुन सकेको छैन् । अहिले अढाई किलोमीटर चार लेन सडक बाहेक बजेट नभएको सडक डिभिजन कार्यालय लहानका प्रमुख रामकुमार देवले बताएका छन् । ‘बजेटको सुनिश्चितता भएको छैन्,’ उनले भने,‘गत आवमा लागेको टेण्डरको बाहेकको बजेट आएको छैन् । फोरलेन बनाउनेको लागि बजेट सायद अगामी आर्थिक बर्षमा आउँछ होला ।’
सहायक राजमार्गबाट राजमार्गमा स्तोरोन्नती गरिएपनि राजपत्रमा चोहर्वा–सिरहा–माडर सडक उल्लेख नभएको भन्दै कार्यालय प्रमुख देवले भने,‘चोहर्वादेखि माडरसम्मको बहुबर्षिय योजनामा सम्झौता गर्ने भएपनि मन्त्रालयबाट स्वीकृत भएन । अहिले पहिलो चरणको काम मात्र थालिएको छ ।’
