सिरहा, चैत २९ गते । प्रादेशिक अस्पताल सिरहाको जेनेरेटरमा आगलागी भएको छ । आगलागीको कारणले प्रादेशिक अस्पताल सिरहामा डायालासिस गराई रहेका एकजनाको मृत्यु भएको ।
मृत्यु हुनेमा सिरहाको बरियारपट्टी गाउँपालिका– खोक्सीका ६५ वर्षीय प्रदीप कुमार दास रहेका छन् ।
डायालासिस वार्डको छेउमै राखिएको जेनेरेटरमा आज दिउँसो आगलागी भएपछि वार्डमा हाताहाती भएको थियो । त्यस क्रममा डायालासिस गराई रहेका दासलाई रगत कमी भएकोले रगत चढाईरहेको थियो । आगलागी भएको जानकारी पाएपछि वार्डमा खटिएका स्वास्थ्यकर्मीले रगतको पाईप चुुडाईदिएको र क्याब नलगाउँदा विरामीको अत्याधिक रक्तश्राव भएको थियो ।
अत्याधिक रक्तश्रावका कारण गम्भीर बनेका दासको उपचारको क्रममा मृत्यु भएको हो । आगलागीको समयमा ८ जना डायालासिस गराईरहेका थिए । डायालासिस संधै भईरहेको र पहिलेदेखि सिकिस्त रहेको र उपचारको क्रममा मृत्यु भएको सूचना अधिकारी अशोक सिंहले बताएका छन् ।
‘जेनेरेटर चल्दै क्रममा आगलागी भयो,’ सूचना अधिकारी सिंहले भने,‘उपचार गराउदै गरेकालाई पछि आकस्मिक कक्षमा उपचार गराएपनि जोगाउन सकिएन् ।’
अरु वार्डमा पनि भर्ना भएका रोगीहरुको भागभाग भएको थियो । डायालासिस, एचडियू, प्रसुति वार्ड लगायतमा भर्ना भएका रोगीहरु आगलागीको चपेटामा पर्ने भन्दै बाहिर निस्किएका थिए ।
यता अस्पतालका मेसु डा नागेन्द्र प्रसाद यादव नेपाल बाहिर रहेका छन् ।
