माइक्रो ब्लगिङ वेबसाइट एक्सका पूर्व सीईओ पराग अग्रवालसमेत कम्पनीका कयौँ पूर्व शीर्ष अधिकारीहरूले कम्पनीका मालिक एलन मस्कविरुद्ध मुद्दा हालेका छन् । सञ्चार माध्यमहरूले यो दाबीसहित समाचार छापेका छन् । जागिरबाट बर्खास्त गरेपछि क्षतिपूर्ति स्वरूप दिनु पर्ने तलबको विषयमा मस्क र शीर्ष कार्यकारीहरूबिच विवाद चलिरहेको बताइएको छ । पराग अग्रवाल, एक्सका पूर्व सीएफओ नेड सिगेल, पूर्व प्रमुख कानुनी अधिकारी विजया गड्डे र एक्सका पूर्व जनरल काउन्सिल सेन एजेट मस्क विरुद्ध अदालतमा गएका छन् ।सञ्चार माध्यममा छापिएका खबरका अनुसार पराग अग्रवालसमेत चारै जना कार्यकारीहरूले एलन मस्कमाथि १२ करोड ८० लाख डलर बराबर विच्छेदन तलब नदिएको आरोप लगाएका छन् । एलन मस्कले ट्विटर किन्ने बित्तिकै पराग अग्रवाल समेतका शीर्ष अधिकारीहरूलाई हटाएका थिए । काममा लापरबाही र दुर्व्यवहार गरेको भन्दै उनले अधिकारीहरूलाई बर्खास्त गरेका थिए । तर यी अधिकारीहरूले मस्कको आरोपको खण्डन गरेका थिए ।मुद्दा अमेरिकाको क्यालिफोर्नियाको जिल्ला अदालतमा दायर गरिएको छ । पूर्व उच्च अधिकारीहरूलाई करार सकिनु अघि नै जागिर बाट निकालिएमा क्षतिपूर्तिको रूपमा विच्छेदन तलब दिइने कुरा करारमा उल्लेख गरिएको दाबी मुद्दाको छ । विच्छेदनको तलबको रूपमा पराग अग्रवाललाई ६ करोड डलर, सिगललाई ४ करोड ६० लाख डलर र गड्डेलाई २ करोड १० लाख डलर दिइनु पर्ने बताइएको छ ।
