फागुन १ गते नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले जनयुद्धमा सहभागी सम्पूर्ण नेता तथा कार्यकर्तालाई ढिलो नगरी एउटै मोर्चा र केन्द्रमा एकताबद्ध हुन अपिल गरे । २९ औँ जनयुद्ध दिवस र प्रथम विधान अधिवेशनको संयुक्त उद्घाटन कार्यक्रमलाई सम्बोधन गर्दै प्रचण्डले एकताका लागि जोड दिएका हुन् ।‘माओवादी जनयुद्धमा सहभागी सम्पूर्ण नेता तथा कार्यकर्ताहरूलाई अब ढिलो नगरी एउटै मोर्चा र केन्द्रमा एकताबद्ध हुन अपिल गर्दछु । जति ढिलो गर्यो, त्यति ठुलो क्षति र यो राजनीति परिवर्तनप्रति घाटा हुन सक्छ । त्यसकारण आउनुहोस् । बसौँ, समीक्षा गरौँ । कहाँ कमी भए ? ठुला मनले, एउटा कम्युनिस्ट मनले आत्मालोचना गरौँ र, एक भएर प्रतिक्रियावादी तथा प्रतिक्रान्तिकारीविरूद्ध प्रतिवाद गरौँ’, उनले अपिल गरेका थिए ।पूर्वमाओवादी घटक र समाजवादी आन्दोलनका सहयात्रीहरू एकजुट भएमा जनयुद्ध, जनआन्दोलन वा क्रान्तिको उपलब्धिमात्र नभइ समाजवादी क्रान्तिमा नयाँ लहर सृष्टि गर्न सकिने उनको भनाइ थियो । प्रचण्डले जनयुद्धमा नेतृत्व स्थापित गर्न सबैले महत्त्वपूर्ण भूमिका रहेको भन्दै जीवनको उत्तरार्द्धमा देशलाई फेरि क्रान्तितिर लैजान आफूले संकल्प गरेको बताएका थिए । नेतृत्वको लागि तर्कसहित कोही आएमा आफूले मार्गप्रशस्त गर्ने उनको भनाइ थियो ।‘तपाईँ जहाँ भए पनि माओवादी युद्धका सहयात्रीहरूले मलाई नेतृत्वमा स्थापित गर्न मद्दत गर्नुभयो । जीवनको यो उत्तरार्द्धमा फेरि एउटा क्रान्तितिर देशलाई लिएर जाने संकल्प गरेको छु’, नेतृत्व हस्तान्तरणका लागि उनले भनेका थिए, ‘कोही कमरेडहरू आउनुहुन्छ । तर्कसहित भन्नुहुन्छ भने म नेतृत्वमा बसिराख्ने कुनै लोभ छैन । यो कुरा पनि म प्रस्ट भन्न चाहन्छु । आउनोस्, फेरि यो मोर्चालाई एकताबद्ध गरौँ । प्रतिक्रियावादी र प्रतिक्रान्तिकारीहरूले टाउको उठाउन खोजेका छन्, तिनलाई प्रतिवाद गरौँ ।’समाजवादी क्रान्तिको लागि आफूले संकल्प गरेको, प्रतिक्रान्तिको खतरा रोक्न पूर्वमाओवादी घटकबिच एकता आवश्यक भएको र तर्कसहित नेतृत्व दाबी गर्न आएमा पद त्याग्न तयार भएको प्रचण्डको अभिव्यक्तिले स्पष्ट पारेको छ । सोही मञ्चबाट उनले एकातिर समाजवादी मोर्चा बनेको र अर्कोतिर समान विचार भएका शक्तिहरूसँग एकता प्रक्रिया अगाडि बढेको दाबी गरेका थिए । तर एक वर्षअघि नै पार्टी एकताका लागि पहल गरेको नेपाल समाजवादी पार्टीका नेताहरूले एकताको सम्बन्धमा कुनै प्रगति नभएको बताएका छन् । प्रचण्डको अभिव्यक्ति सार्वजनिक खपतका लागि आएको हुन सक्ने उनीहरुको आशंका छ ।
