नेपालको लगातार दोस्रो जित, भुटान ८ विकेटले पराजित

एसीसी वुमन्स प्रिमियर कपमा नेपाली टिमले लगातार दोस्रो जित हात पारेको छ । आइतबार मलेसियाको क्वालालम्पुरमा भएको खेलमा नेपालले भुटानलाई ८ विकेटले हराएको हो । भुटानले दिएको ६५ रनको लक्ष्य नेपालले ११.५ ओभरमै दुई विकेटको क्षतिमा हासिल गरेको हो । जसमा सीता राना मगरले अविजित ३७ बलमा ३२ रन बनाइन् । त्यस्तै रुविना क्षेत्रीले २४ बलमा १७ रन बनाइन् । आइतबारको खेलमा कप्तान इन्दु बर्मा भने १ रनमै आउट भइन् । शनिबारकङविरुद्ध भने कप्तान इन्दुले ३३ बल खेली ३ चौका र १ छक्का प्रहार गर्दै ४० रन बनाएकी थिइन् । अर्की ब्याटर कविता कुँवर ५ रनमा आउट भइन् ।भुटानका लागि अञ्जु गुरुङ र अन्जली घलेले १/१ विकेट लिए ।यसअघि बायुमास क्रिकेट ओभलमा टस हारेर पहिले ब्याटिङमा आएको भुटानले निर्धारित २० ओभरमा ४ विकेट गुमाउँदै ६५ रन बनाएको थियो । भुटानका लागि ङवाङ छोडेनले सर्वाधिक २५ रन बनाइन् । त्यस्तै डेचेन वाङ्मोले १७ र छिरिङ जाङ्मोले १६ रन बनाए ।नेपालका लागि इन्दु बर्मा, कविता कुँवर, सीता राना मगर र कविता जोशीले १/१ विकेट लिए । नेपाल समावेश समूह ‘डी’मा हङकङ, माल्दिभ्स र भुटान रहेका छन् । नेपालले अब मंगलबार माल्दिभ्ससँग खेल्ने छ । १६ राष्ट्र सहभागी प्रतियोगितामा प्रत्येक समूहका शीर्ष दुई टोली क्वार्टरफाइनल पुग्ने छन् ।