बुटवलमा सञ्चालित राष्ट्रपति रनिङ सिल्ड प्रतियोगिताको उपाधि कालिका मानवज्ञान माध्यमिक विद्यालयले हात पारेको छ ।२५ स्वर्ण, ११ रजत र ३ कास्यसहित ३९ पदक प्राप्त जित्दै कालिकाले प्रथम स्थान हासिल गरेको हो । उसले २५ हजार नगद पुरस्कार प्राप्त गरेको बुटवल उपमहानगर्पलिका खेलकुद विकास समितिका संयोजक बोनिन पियाले बताए ।प्रतियोगितामा न्यु होराइजन बोर्डिङ स्कुलले ७ स्वर्ण, ३ रजत र ६ कास्यसहित १६ पदक जित्दै दोस्रो भएको छ। न्यु होराइजनले उपाधीसँगै नगद १७ हजार ५ सय नगद पुरस्कार प्राप्त गर्यो। प्रतियोगितामा फिल्ड हाइजम्प, लङजम्प, त्रिपलजम्प, ज्याभलिङ थ्रो, सटपुट, रिले दौड, भलिबल, कबड्डी, तेक्वान्दो लगायतका १७ विधाका ५४ खेलमा प्रतिस्पर्धा भएको थियो।बुटवल ११ देविनगरस्थित एन्फा एकेडेमीको खेलमैदानमा शनिबार अबेर सकिएको प्रतियोगितामा ४ स्वर्ण, १ रजत र ५ कास्यसहित १० पदक जित्दै दीप बोर्डिङ स्कुल तेस्रो भयो। दीपले तेस्रो उपाधिसँगै नगद १० हजार रुपैयाँ पुरस्कार प्राप्त गरेको छ।प्रतियोगिताको समापनको अवसरमा बुटवल उपमहानगरपालिकाका प्रमुख खेलराज पाण्डेय, उपप्रमुख सावित्रादेवि अर्याल, प्रमुख प्रशासकिय अधिकृत मित्रमणि खनाल, नगर खेलकुद विकास समितिका संयोजक बोनिन पियाले विजेता टिम तथा उत्कृष्ट खेलाडीलाई पुरस्कार वितरण गरेका थिए।नगरका ७२ विद्यालयमध्ये सामुदायिकतर्फ २१ र संस्थागततर्फ २१ गरी ४२ वटा विद्यालयका ३ हजार ३५ जना विद्यार्थीले प्रतियोगितामा भाग लिएको संयोजक पियाले जानकारी दिए।
