प्रधानमन्त्री कप पुरुष राष्ट्रिय क्रिकेट प्रतियोगिताको आइतबारको खेलमा गण्डकी प्रदेशले कर्णाली प्रदेशलाई जितका लागि एक सय २३ रनको लक्ष्य दिएको छ । सिद्धार्थनगर रंगशालामा टस हारी पहिले ब्याटिङको निम्तो पाएको गण्डकी प्रदेशले निर्धारित ४५ ओभरमा नौ विकेट गुमाएर एक सय २२ रन बनाएको हो ।गण्डकी प्रदेशका माथिल्ला पाँच ब्याट्सम्यानले दोहोरो अङ्कमा रन बनाउन सकेनन् । अमृत गुरुङ र कमल परियारले सर्वाधिक २१–२१ रन बनाए । अश्विनी राणाले टोलीको खातामा १६ रन थपे । चन्द्र पौडेल १४ रनमा अविजित रहे ।कप्तान विपिन खत्री १० रन बनाउँदै पभेलियन फर्किए । गण्डकी प्रदेशका अन्य ब्याट्सम्यानले भने दोहोरो अङ्कमा रन बनाउन सकेनन् । अङ्कित न्यौपाने दुई रनमा अविजित रहे । ओपनर ईश्वर क्षेत्री शून्य रनमै आउट भए ।अर्का ओपनर समीर कँडेल पनि एक रनभन्दा अगाडि बढ्न सकेनन् । गण्डकी प्रदेशले अतिरिक्त रूपमा २६ रन पायो । गण्डकी प्रदेशका कुनै पनि ब्याट्सम्यानले बनाएको भन्दा यो बढी रन हो । कर्णाली प्रदेशका बलर अनुज चनरा, दिनेश अधिकारी र दीपेन्द्र रावतले दुई–दुई विकेट लिए । रवीन्द्र शाही, दिवान पुन र प्रकाश जैसीले पनि एक–एक विकेट हात पारे ।
