नेपालका लागि जापानी राजदूत किकुता युताकाले विश्व शान्तिको मुहान र बौद्धमार्गीको महत्त्वपूर्ण पवित्र स्थल लुम्बिनी भएकाले यसको विकास, अध्ययन र अन्वेषणमा जापान सदैव सहकार्य गर्न तयार रहेको बताएका छन् ।बुद्ध जन्मस्थल लुम्बिनीका ऐतिहासिक र पुरातात्विक क्षेत्रको भ्रमण गरेपछि लुम्बिनी विकास कोष उपाध्यक्ष ल्याहारक्याल लामासँगको भेटमा जापानी पर्यटकको आगमन बढाउन र लुम्बिनीको प्रचारप्रसार जापानमा गर्नेबारे छलफल भएको थियो । भेटमा दुई देशबीचको मित्रवत सम्बन्ध र लुम्बिनीको आध्यात्मिक र पर्यटकीय विकासका सहकार्यका विषयमा समेत छलफल भएको थियो । भेटघाटमा लुम्बिनी विकास कोषका पदाधिकारी र उच्च अधिकारीको समेतको उपस्थिति रहेको थियो ।उपाध्यक्ष लामाले लुम्बिनी विश्व शान्तिको केन्द्र भएको बताउँदै यसको विकासका लागि जापानसँग कोषले सहकार्य गरेर अगाडि बढ्न चाहेको बताए । सन् १९७८ मा जापानिज वास्तुकलाविद् केन्जो टाङ्गेले तयार पारेको लुम्बिनी गुरुयोजना कार्यान्वयनका सम्बन्धमा पनि राजदूतसँग उपाध्यक्ष लामाले छलफल गरे । दोस्रो विश्वयुद्धपछि जापानमा भएको नरसंहारले आफूहरू शान्ति, अहिंसा र सत्मार्ग रहेकाले लुम्बिनी पवित्रस्थल रहेको राजदूत युताकाले बताए । राजदूत युताकासहितको टोलीले मायादेवी मन्दिर र शान्तिदीप अवलोकन गरेका थिए ।