सलहेश टाइम्स, ३ कार्तिक, कर्जन्हा । सलहेश समाज विकास प्रतिष्ठानद्वारा संचालित सामुदायिक रेडियो गंगाजल एफ.एफ.८७.८ मेगाहर्ज आज चार वर्ष पुरा गरी सफलताका साथ पाँचौ वर्षमा प्रवेश गरेको छ । सिरहाको कर्जन्हा नगरपालिका कर्जन्हा बजारमा सञ्चालित सामुदायिक रेडियोले ग्रामिण भेगको सूचना तथा समाचारलाई मुख्य प्राथमिकतामा राख्दै समाजका विभिन्न समस्याहरुलाई उठाउदै आइरहेका छन् । रेडियो गंगाजलमा लोकप्रिय विभिन्न कार्यक्रमहरु बिगत ४ वर्ष देखि नियमित रुपमा सञ्चालन हुँदै आएकोले जनतामा लोकप्रियता बढ्दै गएको रेडियो गंगाजलका प्रबन्ध निर्देशक सरोज कुमार पासमानले बताए ।
सिरहा जिल्लामै ग्रामिण भेगबाट सञ्चालन हुने सामुदायिक रेडियो गंगाजल पहिलो रेडियो भएकाले ग्रामिणभेगकै समाचारलाई प्राथमिकताका साथ उठाउदै आएको र शहर केन्द्रित रहेका मिडियाहरुले ग्रामिण भेगका मजदुर, किसान र आमजनसमुदायहरुको समस्या खासै समेट्न नसकिरहेको अवस्थामा रेडियो गंगाजलले त्यसलाई मुख्य उद्देश्यको रुपमा लिएको प्रबन्ध निर्देशक पासमानले बताए ।
बढ्दै गइरहेको प्रबिधिलाई मध्यनजर गर्दै रेडियो गंगाजलले अनलाईन टेलिभिजन, अनलाईन खबर पत्रिका लगायतका सञ्चारका माध्यमहरु संचालन गरेको र त्यसबाट जनताको विभिन्न मुद्दाहरु समेत समाधान भइरहेकोले आफुलाई खुसी लागेको प्रबन्ध निर्देशक पासमानले बताए ।
सामुदायिक रेडियो गंगाजलको स्थापना मिति २०७६ कार्तिक ३ गते तत्कालिन उद्ययोग वाणिज्य तथा आपुर्ति मन्त्री मातृका प्रसाद यादवले गरेका थिए ।
