काठमाडौँ — नेपाल सशस्त्र प्रहरी बलले तिहारको अवसरमा कुकुर पूजा गरेको छ । तिहारको दोस्रो दिन आइतबार कुकुर तिहार मनाइँदैछ ।तिहारको दोस्रो दिन हिन्दु नेपालीहरूको घर आँगनमा कुकुरको पूजा गरिन्छ । कुकुरलाई फूल, माला र टिका लगाइदिएर खानेकुरा दिई पूजा गर्ने परम्परा रही आएको छ ।सशस्त्र प्रहरी बल बलम्बुका पशु स्वास्थ्य तथा डग हेण्डर उपशाखाका सशस्त्र प्रहरी नायव निरीक्षक रमेश उप्रेतीले सशस्त्र प्रहरी बलसँग ४ जातका कुकुर रहेको जानकारी दिए । सशस्त्र प्रहरीसँग जर्मन सेफर्ड, ल्याब्रेडर, ककर स्पाइनर र गोल्डे डिटिबर जातका कुकुर रहेको बताए ।कुकुरहरूलाई लागुऔषध, हातहतियार तथा बिष्फोटक पदार्थको खोजि कार्य र अपराध अनुसन्धानमा तालिम दिई काम गराइएको उप्रेतीले बताए । कुकुरहरूले बाढीपहिरो र विपद्जन्य काममा पनि उद्दारमा खटिने गरेको उनले जानकारी दिए ।तिहारको दोस्रो दिनलाई नरक चतुर्दशी पनि भनिन्छ । यस दिन कुकुरलाई विशेष प्रकारका खानेकुरा खान दिने चलन छ । कुकुर घरपालुवा आज्ञाकारी, घर रक्षक एवं गुनिलो जनावर पनि हो । यो जनावरले सुँघेर अपराधी पत्ता लगाउने र कुकुरलाई भैरवको बहान पनि भनिन्छ ।त्यसैगरी विनाशकारी प्राकृतिक प्रकोप तथा दैवी विपत्ती हुने बेलामा कुकुरले सुँघेर वा दायाँबायाँ कराई पूर्वसूचना समेत दिने गरेको छ । कुकुर इमान्दार र बफादार जनावर पनि हो । घरको रेखदेख गर्ने काम पनि कुकुरले नै गर्दछ । परापूर्वकालदेखि कुकुरलाई वर्षमा एकपटक इमान्दार पहरेदार जन्तुका रूपमा पूजा गर्ने चलन छ । कुकुरका गुणको कदर गरेर मानिसले वर्षमा एक पटक यमपञ्चकको दोश्रो दिन पारेर पुज्ने गर्दछन् ।