सरोज कुमार पासमान, कर्जन्हा, १४ पौष । चुरे तथा वन क्षेत्रमा ढुंगा, गिट्टी, बालुवा उत्खननमा ऐन, कानुन विपरीत सिफारिस गरेको आरोपमा वडा अध्यक्ष र चुरे उत्खननमा सक्रिय रहेको आरोपमा कर्जन्हा नगरपालिकाबाट क्रेसर संचालक समेत पक्राउ परेको छ ।
डिभिजन वन कार्यालय लहानले सिरहाको कर्जन्हा नगरपालिका वडा नं. १ का अध्यक्ष फणीन्द्र प्रसाद पोख्रेललाई पक्राउ गरेको डिभिजन वन कार्यालय लहानका सूचना अधिकारी राधेश्याम चौधरीले जानकारी दिए । गत पुस ७ गते कर्जन्हा नगरपालिका वडा नं. १ बल्टिया स्थित चुरे वन क्षेत्र भित्रको कमला नदीको बगरमा एक्स्काभेटर प्रयोग गरी अवैध रुपमा ढुङ्गा, गिट्टी, बालुवा उत्खनन कार्यमा ऐन, कानून विपरीत सिफारिस गरि सहयोग गरेको प्रमाण भेटिएपछि वनले वडा अध्यक्ष पोखरेललाई पक्राउ गरेको हो ।
डिभिजन वन कार्यालय लहानले सक्रियता देखाएसंगै चुरे तथा वन क्षेत्रमा ढुंगा, गिट्टी, बालुवा उत्खनन ऐन, कानुन विपरीत गरेको आरोपमा ४ जना पक्राउ परेको परिसकेको बताएका छन् ।
अध्यक्ष पोखरेललाई थप अनुसन्धानको लागि डिभिजन वन कार्यालय लहानको हिरासतमा राखिएको सूचना अधिकारी चौधरीले बताए ।
पक्राउ परेका वडा अध्यक्ष पोखरेल संगै ४ जनाको ब्यान सकिएको र उनिसंगै सबैलाई सोमबार सरकारी वकिलको कार्यालयमा पेश गर्ने र उनिहरु मथि मुद्दा चल्नेकि नचल्ने कुरा त्यहाँबाट निर्णय हुने सूचना अधिकारी चौधरीले रेडियो गंगाजललाई जानकारी दिए ।
यसै मुद्दामा बिहीबार डिभिजन वन कार्यालय लहानले कर्जन्हा नगरपालिका–७ स्थित कमला नदी किनारमा कम्लेश्वरी कमला क्रसरका सञ्चालक मोहम्मद खलिल राइनलाई पक्राउ गरि अनुसन्धान गरिरहेकै अवस्थामा वडा अध्यक्ष पक्राउ परेको छ ।
पुस ७ गते वन क्षेत्रमा पर्ने कमला नदी किनारबाट उत्खनन गरिरहेको अवस्थामा एक थान एक्स्काभेटरसहित चालक प्रदीपकुमार दर्लामी र स्थानीय ठेकेदार नीरज बस्नेतलाई नियन्त्रणमा लिइएको थियो ।
नियन्त्रणमा लिइएकाहरूलाई डिभिजन वन कार्यालयको हिरासतमा राखेर थप अनुसन्धान भइरहेको चौधरीले बताए ।
डिभिजन वन प्रमुख सुजितकुमार झाका अनुसार कर्जन्हाको बन्दीपुरस्थित सबडिभिजन वन कार्यालयको गस्ती टोलीले बल्टियाको वन क्षेत्रमा पर्ने कमला नदी किनारबाट प्रारम्भिक वातावरणीय परीक्षण (आइई) नगरी खन्दै गरेको अवस्थामा एक्स्काभेटरसहित दुईजनालाई नियन्त्रणमा लिए संगै यस कार्यमा कर्जन्हाको जनप्रतिनिधीको समेत संलग्नता देखिएको बताए ।
कमला नदीमा अबैध उत्खन्न भइरहेको भन्दै कर्जन्हा नगरपालिकाको जनताहरु पटक पटक कर्जन्हा नगरपालिकाको कार्यालय र नगरपालिकाको विभिन्न स्थानहरुमा नारावाजी गरेपनि कर्जन्हा नगरपालिकाले मौनता देखाएपछि डिभिजन वन कार्यालय लहानको सक्रियतामा वडा अध्यक्षनै पक्राउ परेको हो ।
डिभिजन वनले ४ पुसमा सिराहा जिल्ला अदालतमा कानुनविपरीत वन क्षेत्रको खोला ठेक्का लगाएको आरोपमा सिराहाको धनगढीमाई नगरपालिकाका प्रमुख प्रशासकीय अधिकृत ओमप्रकाश महतो, प्रशासन शाखा सहायक रञ्जितकुमार सिंह र वन वरुण कन्स्ट्रक्सनका प्रोप्राइटर नीलमकुमारी यादव, अवैध उत्खननमा संलग्न आठ ट्याक्टर तथा जेसिबीचालक र सातजना व्यवसायीविरुद्ध मुद्दा दायर गरेको थियो ।
