काठमाडौंमा भारतीय नागरिकको हत्या गरेको आरोपमा एक युवक पक्राउ

दशैंको टीकाको दिन काठमाडौं महानगरपालिका–१९ स्थित रामघाटमा भारतीय नागरिक ४७ वर्षका दिलीप आदक मृत भेटिए । हेमन्त महर्जनको घरमा डेरा गरेर बस्ने पश्चिम बंगालस्थित कलकत्ता घर भएका आदकको हत्यापछि हत्याराले बाहिरबाट ताला लगाएर हिँडेका थिए ।

सो हत्यामा संलग्न आरोपमा प्रहरीले एकजनालाई पक्राउ गरेको छ । पक्राउ पर्नेमा पर्साको बहुदरमाई नगरपालिका–२ हांसवा घर भएका २५ वर्षीय श्रीलाल ठाकुर उर्फ राजाबावु छन् । असोज २३ मा श्रीलाललाई स्वयम्भूबाट पक्राउ गरिएको उपत्यका अपराध अनुसन्धान कार्यालयका एसपी कृष्ण कोइरालाले रातोपाटीलाई बताए ।

भारतीय नागरिकलाई हत्या गरेर कपडाले छोपेर छाडेको अवस्थामा प्रहरीले कोठा फोडेर शव बरामद गरेको थियो । शवको गन्ध आएपछि घर धनीले प्रहरीलाई खबर गरेका हुन् । राजाबावु  र मृतक साथी हुन् । उनीहरू केही महिनादेखि सो कोठामा सँगै बस्थे । राजाबावुले काठ च्याप्न प्रयोग गरिने सकिन्जाले टाउकोमा प्रहार गरेर भारतीय नागरिकको हत्या गरेको प्रहरीको अनुसन्धानबाट थाहा भएको छ ।

हत्यापछि भारतीय नागरिकले काठको बाकसमा राखेको ४ लाख नगद आरोपीले लैजाने प्रयास गरेका थिए । बाकस आधा फुटाएको अवस्थामा प्रहरीले ४ लाख नगद समेत बरामद गरेको छ । आरोपीलाई थप अनुसन्धानका लागि वृत्त जनसेवामा पठाइएको एसपी कोइरालाले जानकारी दिए ।