गुन्द्रुक अनलाईन
शिक्षक सेवा आयोगले माध्यमिक तह तृतीय श्रेणीतर्फ शिक्षक पदको लिखित परीक्षाको नतिजा सार्वजनिक गरेको छ । १५ चैत २०७८ र ९ असार २०७९ मा लिइएको लिखित (सामान्य र विषयगत) परीक्षाको नतिजा सार्वजनिक गरेको हो ।
सार्वजनिक नतिजा अनुसार ३७३ जना अन्तर्वार्ताका लागि छनोटमा परेका छन् । ३१४ सिटका लागि लिइएको लिखित परीक्षामा एक हजार २४९ जना परीक्षार्थी सहभागी थिए । परीक्षामा अमर्यादित कार्य गर्ने २ जनालाई आयोगले कारवाही गरेको छ । एउटाको परीक्षा रद्द गरिएको छ भने अर्कालाई दुई वर्षसम्म आयोगले लिने कुनै पनि परीक्षामा सहभागी हुन नपाउने गरी कारवाही गरेको छ ।
प्रदेश १ बाट १०४ जना अन्तर्वार्ताका लागि छनोटमा परेका छन् । ८० सिटका लागि लिइएको परीक्षामा ३३६ जना सहभागी थिए । परीक्षामा अमर्यादित कार्य गरेका एक जनाको परीक्षा रद्द गरेको छ । शिक्षक सेवा आयोग नियमावली, २०५७ को नियम ४३ अनुसार पुष्प खनाललाई कारवाही गरिएको आयोगले जनाएको छ । उनले उत्तरपुस्तिकामा आफ्नो नाम र ठेगाना उल्लेख गरेका थिए । मधेश प्रदेशबाट २९ जना अन्तर्वार्ताका लागि छनोटमा परेमा छन् । २२ सिटका लागि लिइएको परीक्षामा ४८ जना सहभागी थिए ।
बागमती प्रदेशबाट ७५ जना अन्तर्वार्ताका लागि छनोटमा परेका छन् । ६६ सिटका लागि लिइएको परीक्षमामा २३९ जना सहभागी थिए । बागमती प्रदेशबाट एक जनाको परीक्षा रद्द गरिएको छ । सामान्य परीक्षामा अनुत्तीर्ण भएकोमा पास भएको भनि अर्काको रोलनम्बरबाट परीक्षामा सहभागी भएका भविश्वर गुरूङलाई दुई वर्षसम्म आयोगबाट लिइने कुनै पनि परीक्षामा सहभागी हुन नपाउनेगरी रोक लगाइएको आयोगले जनाएको छ ।
गण्डकी प्रदेशबाट ७३ जना अन्तर्वार्ताका लागि छनोटमा परेका छन् । ६१ सिटका लागि लिइएको परीक्षामा २७८ जना सहभागी थिए । लुम्बिनी प्रदेशबाट ४७ जना अन्तर्वार्ताका लागि छनोटमा परेका छन् । ३८ सिटका लागि लिइएको परीक्षामा १७७ परीक्षार्थी सहभागी थिए ।
कर्णाली प्रदेशबाट १७ जना अन्तर्वार्ताका लागि छनोटमा परेका छन् । २० सिटका लागि लिइएको परीक्षामा ४२ जना सहभागी थिए । सुदूरपश्चिम प्रदेशबाट भने २८ जना अन्तर्वार्ताका लागि छनोटमा परेका छन् । २७ सिटका लागि लिइएको परीक्षामा १२९ जना सहभागी थिए । अन्तर्वार्ता आगामी असोज २६,२७ र २८ गते हुने आयोगले जनाएको छ । सबैको अन्तर्वार्ता शिक्षक सेवा आयोगको कार्यालय सानोठिमी भक्तपुरमा हुनेछ ।
गुन्द्रुक अनलाईन
प्रतिक्रिया