‘प्रहरीको हाकिम हुँ’ भनेर व्यापारीसँग पैसा मागेको आरोपमा पक्राउ

विराटनगरका व्यापारीलाई ‘प्रहरीको हाकिम हुँ’ भनेर पैसा मागेको आरोपमा प्रहरीले एकजनालाई पक्राउ गरेको छ ।

पक्राउ पर्नेमा विराटनगर महानगरपालिका–२ घर भएका रविन घिमिरे छन् । महानगर–१५ स्थित १ नम्बर ढाटमा व्यापारीहरूलाई ‘प्रहरीको हाकिम हुँ’ भनेर पैसा मागेको सुराक आएपछि घिमिरेलाई पक्राउ गरिएको जिप्रका मोरङका डिएसपी दिपक श्रेष्ठले रातोपाटीलाई बताए । पैसा मागेको अडियो प्रहरीले फेला पारेको छ ।

आरोपी विरुद्ध अभद्र व्यवहार मुद्दामा जिल्ला प्रशासन कार्यालयबाट म्याद लिएर अनुसन्धान भइरहेको डीएसपी श्रेष्ठले जानकारी दिए । जिल्ला प्रशासन कार्यालयबाट ५ दिनको म्याद लिएर इलाका प्रहरी कार्यालय रानीले घटनाबारे अनुसन्धान गरिरहेको छ ।